السويسرول من مطبخ محمد

السلام عليكم و رحمة الله و بركاته

سبحان الله و بحمده عدد خلقه و زنة عرشه و مداد كلماته و رضا نفسه .

النهارده صورتلكم السويسرول اللى ماكنتش أتوقع إنى حاعمله فى يوم من الأيام لولا حبيبتى أم عمر 12 أستاذة الحلويات اللى شجعتنى انى أعمله ومن يوميها وأنا ما بطلتش أعمله تفتكروا ليه 
أولا :لإنه أسهل بكتييير من التورتة وأشيك من الكيكة
ثانيا :إقتصادى جدا عن التورتة
ثالثا : باحتفظ بيه فى الفريزر وبيظهر عند اللزوم
رابعا : لما باحب أعمل تورته كبيرة شوية باستعين بيه بصوا كدة عالصورة دى [/color]


إيه رأيكم أظن بتقولوا عليا رغايه .................بصراحة ليكم حق أعمل إيه بتوحشونى وباحب أتكلم معاكم
عموما نخش فى المهم

أهم حاجتين فى موضوع السويسرول دة ورق الزبدة والصينيه المستطيلة أنا استخدمت صينيه مقاس 40
وورق الزبدة بيتباع فى السوبر ماركت رول زى الفويل كدة أو بيتباع بالفرخ فى المكتبات
المقادير :[/size]

1- أربع بيضات كبار
2- كوباية سكر
3- كوباية دقيق
4 –كيسين فانيليا
5- ست ملاعق كبيرة مية دافية
الطريقة :
- نولع الفرن ونضبطه على درجة حرارة 180 درجة
- ندهن الصينية زيت ونبطنها بورق الزبدة
- نفصل البياض عن الصفار
- نضيف الفانيليا
- نضرب الصفار مع الماء و نصف كمية السكر لغايه أما نوصل لشكل الكريمة

- نضرب البياض مع بقية كمية السكر لحد أما نوصل لشكل المارينج وممكن تضيف نقطتين خل للبياض قبل بداية الضرب

- نضيف الدقيق على الصفار حبه حبة ونقلب بملعقة خشب فى اتجاه واحد لحد أما نصف كمية الدقيق

تخلص وبعدين نضيف نصف كمية المارينج (بياض البيض المضروب)ونخلط كويس فى اتجاه واحد لحد الإمتزاج الكامل

وبعدين نكرر الموضوع مرة تانيه يعنى نضيف بقية الدقيق وبعدين بقية المارينج
-كدة الخليط جاهز

-نصبه فى الصينيه
-ونساوى بالملعقة


- وندخله الفرن بيقعد فى الفرن مابين 12 إلى 15 دقيقة ومش أكتر من كدة عشان ما ينشفش
- يعنى أما يعدى 12 دقيقة نفتح بالراحة ونشوف اللون بتاع الكيك لو دهبى يبقى خلاص لو لسة ابيض يبقى لسة \
وممكن نختبر بعصاية الشيش الخشب لو طلعت ناشفة يكون الكيك استوى

- طلعت الصينية من الفرن نسيبها تهى تلات دقايق وبعدين نبتدى نتعامل معاها لازم نتعامل مع الكيك وهو دافى عشان نعرف نلفه لو برد مش حينفع خالص
هنا بقى حنحتاج فرخين ورق زبدة
بنطلع الكيك من الصينيه بالورق اللى اتخبز بيها

وبعدين بنقلبه على وشه على فرخ

ونفك الورق بالراحة وبعدين .

.نعدله مرة تانيه على الفرخ التانى

- نلف الكيك بورقة الزبدة بالشكل دة بحيث ان الورق يكون متداخل مع الكيك

-وندخله فى التلاجة حوالى نصف ساعة نكون جهزنا الحشوة
-نفك الكيك من الورق بيكون خد الشكل الاسطوانى
-نحط الحشوة



- نلف الكيك عالحشوة بشكل الإسطوانة ونغلفه بورق الزبدة كويس وندخله الفريزر حوالى ساعة

- ودة بيكون شكله عند التقديم


يارب تكونوا استمتعتم واستفدتم من الموضوع منتظر ردككم